A sos caros lettores
Cumpadide, carissimos lettores,
si sos versos sun pagu fioridos,
coment'atteras cosas sun naschidos
cun buntante difettu e cun errores.
Sa poesia est chei sos fiores,
non semper dan profumos aggradidos,
e fruttos prelibados e dechidos
difettan in bellesas e sabores.
Cun nobile decoro e sentimentu,
e cun celestiale aggiudu 'e Deu,
ogni versu cun gustu happo tessidu.
E de su ch'appo fattu so cuntentu,
augurende chi su libru meu
a sos lettores siat aggradidu.
Si su chi legget ad'esser poeta,
ogni frazilidade mi perdona,
e sa ch'est mala mi la faghet bona,
e sa ch'est torta la faghet deretta,
est ca non sò intradu a sa pinnetta,
de Appollo, c'hat fattu in s'Elicona,
ei sas musas chi happo invocadu,
tristu e in'oriolu mi han lassadu.